أنا عندي ليها هنا طريقة حلوة

جربوها وان شاء الله مش هتندموا أبداً

بسم الله الرحمن الرحيم

قبل أي حاجة لازم نعمل صوص الشيكولاتة وهو كالتالي:

مج كاكاو خام ( من عند العطار )

مج لبن بارد

مج زيت

مج سكر ( ممكن مج ونصف حسب الرغبة )

كيس فانيليا

بعد كده نضربهم مع بعض كويس أوي في الخلاط

بعد مايتجانس الخليط هناخد منه مج واحد بس ونحطه في الفريزر على ما نجهز الكيك

5 بيضات

كيس فانيليا

كيس بيكينج باودر

2 كوب دقيق

1 كوب سكر

باقي صوص الشيكولاتة

3 ملاعق سمنة أو زبدة سايحة

( ملحوظة: أغلب الناس بيحطوا بدل السمنة زيت علشان بتكون خفيفة اكتر لكن انا بحب أحطلها سمنه بقري علشان طعمها بيكون أجمل )

نضرب البيض مع الفانيليا كويس اوي على السرعة الهادية وبعدين بنزود السرعة تدريجياً

بعد كده بنضيف السكر بالتدريج لحد مايكون عامل معانا زي الكريمة

ننزل على الخليط ده بالسمنة وبعد كده الكمية المتبقية من صوص الشيكولاتة

بعد كده بننزل عليه الدقيق والبيكنج باودر( ولو لقيتي الكيكة مش مدياكي القوام اللي انتي متعودة عليه وبتحبية ممكن تزودي الدقيق شوية )

ادهني الصينية بالزبدة ورشي عليها الدقيق وصبي عليها الكيكة

دخليها الفرن وتكوني مسخناه من قبلها وتسيبيه على أعلى درجة حرارة عندك لمدة عشر دقائق وبعد كده تهدي عليها النار

بعد كده نطلع مج الصوص من الفريزر

نقطع الحروف والأجناب والوش بتاع الكيك علشان تشرب الصوص ومايكونوش ناشفين

نصيحة مني ليكي ماتقطعيهاش غير لما تهدى وتبرد شوية

بعد كده نقسمها لقسمين وتدهنيها بالصوص

( على فكرة الصوص ده مابيتصبش ده بيكون تقيل وانتي بتدهنيه على الكيكة )بالمعلقة

بعد كده نحط النصف التاني من الكيك

وبعد كده باقى الصوص

ونحطها فى التلاجة وبعدين نقطعها زى الجاتو